February 23, 2019

ආදරේ ඇත නුදුටු තැන්වල

පහුගිය දවස් වල අපේ බාත්රූම් එකේ වතුර බහින නළය ටිකක් හිර වෙලා තිබුණ. අපේ බාත්රූම් එක කිවුවේ, මේක මම තනියම පාවිච්චි කරන එකක් නෙවෙයි, අපේ ගෙහිමියාගේ බෑණා (අක්කගෙ පුතා) එක්ක මම මේක ශෙයා කරනවා.

ශෙයා කරනවා කිවුවට ඇත්තටම ඒක ටිකක් වාසි ඩීල් එකක්. මම මේ කාමරේට කැමති වෙන්නත් ඒක එක හේතුවක්. මේ බෑණා රැකියාව උදෙසා දිවයිනේ හැමතැනකම වගේ ඇවිදින්න යනව. එයාගේ නිවහන සහ පවුල ඉන්නේ එංගලන්තයේ දකුණු දිගට වෙන්න. නමුත් හෙඩ් ඔෆිස් එක තියෙන්නේ මධ්‍යම එංගලන්තයේ (Midlands). ඉතින් හෙඩ් ඔෆිස් එකට ආපුවම, සතියට දවසක් හෝ දෙකක් තමයි මේ බෑණා මම ඉන්න ගෙදර නවතින්නෙ. අනිත් හැම දවසකම වගේ ඔහු එක්කෝ රැකියාව එක්ක ඇවිදිනවා, නැත්නම් දකුණු එංගලන්තයේ තියන නිවහනට වෙලා ඉන්නව. ඉතින් බාත්රූම් එක ශෙයා කරනවා කියල කිවුවට, ඇත්තටම සතියේ වැඩි දවසක් ඒක මගේ විතරයි, නමුත් මේ කාමරේ ගාස්තුව, ඇටෑච් බාත්රූම් එකක් තියන කාමරේකට (en suite) වඩා සෑහෙන්න අඩුයි. කෝමහරි මේ බෑණගෙයි මගෙයි වචන වලින් නොකී ගිවිසුමක් වගේ, අපි ඕක බොහොම පිරිසිදුවට තියන් හිටිය. විශේෂයෙන්ම ටොයිලට් සීට් එක කවදාවත් ඒ මනුස්සයා සවුත්තු කලේ නෑ.

මේ බෑණාට ඉන්නවා දරුවෝ තුන් දෙනෙක්. පළමු රිලේෂන්ශිප් එකෙන් එක්කෙනයි, දෙවෙනි රිලේෂන්ශිප් එකෙන් එක්කෙනයි, තව එක්කෙනෙක් ඔන් ද වේ. ඔහොම ඉන්නකොට මේ සති කීපයක් උඩදී, මේ මනුස්සය තව ගැහැණු කෙනෙක් එක්ක සෙට් වෙලා, ගෙදරට එක්කගෙන ආව. ගෙදර අනිත් අයත් හරිම ආදරෙන් කතා කර කර ඉන්නවා දැන් අලුත් ජෝඩුව එක්ක. මට මේක දැක්කම දැන් හරිම ඔඩ් ඉතින්, ටිකක් දුකයි. අර මනුස්සයා දරු ගැබක් දරන් ඉන්නකොට මෙයා මෙහෙම හැසිරෙන එක හරිද? අපි ඉතින් ගෑණු නේ. සාමාන්‍යයෙන් පිරිමි කෙනෙක් ඔහොම ඉන්නවා දැක්කම මාළු නටනව නේ ඇඟේ. :D

හැබැයි අර අලුත් ගෑණු කෙනා හරිම විනෝදකාමී, අහිංසක කෙනෙක්. මාත් එක්ක යාලු උනා හරිම ඉක්මනට.

ඉතින් මම පටන් ගන්නකොටම කිවුවනේ බාත් ටබ් එකේ වතුර බහින නළය හිර වුණා කියල. මට හේතුව විදියට හිතුනෙම, මගේ කෙස් ගස් ඔය නළය අස්සේ හිරවෙලා ඇති කියල. මම හැමදාම නෑවට පස්සේ ඩ්රේන් කැප් එක උඩ තියන කෙස් ගස් ටික අරන් ඉවත් කරනව, නමුත් ඉතින් ඒකෙ සිදුරු වගේ තියන නිසා කෙස් ටිකක් විතර ඕක අස්සට යනවා ඇති. මගේ කොන්ඩෙත් ටිකක් ගණකම් කැරලි සහිත නිසා, කැරලි ගැහිලා හිර වෙලා ඇති.


මානවී වගේ කොණ්ඩයක් තියන ළමයෙක් නාන පින්තූරයක්. පින්තූරය https://www.wikihow.com/Care-for-Your-Curly-Hair වෙතින්.

ෂවර් එක සවි කරලා තියෙන්නේ බාත් ටබ් එකට උඩින් නේ. ඉතින් ඇඟ හෝදන නාන හැම වෙලාවකම, වතුර පිරෙනවා බාත් ටබ් එකේ, වළලුකර ට ටිකක් පහලට වෙන්න විතර. ඊට පස්සේ හෙමින් හෙමින් වතුර බැස්සට, අර සබන් ගතියත් එක්ක කුණු වගේ බාත් ටබ් එකේ පතුලේ ගෑවිලා තියනවා. පිරිසිදු කරන්න ටිකක් කරදරයි, මොකද බාත්ටබ් එකේ පතුල හෝදන්න වතුර දැම්මම, ඒ වතුර ටිකත් බහින්නේ නැතුව රැඳෙනවා නේ.

මම දවසක් ඕක සුද්ද කරන්න ගිහින්, උඩ තට්ටුවේ බාත්රූම් එකේ වතුර ටිකක් ලීක් වෙලා, ඒ වතුර ටික පහල තට්ටුවේ වහල හෙවත් ස්ලැබ් එකේ සවි කරපු ලයිට් එකක් අස්සෙන් බිමට වැටිලා, ට්‍රිප් එක ගියා. එදා ඉඳන් මම ඕක සුද්ද කරන වැඩේ අත ඇරලා දැම්ම, සමනල් පිහාට්ටක් අතගානවා වගේ පරිස්සමට නාගෙන, බාත්ටබ් එකෙන් එලියට ඇවිත් ආයේ කකුල් දෙක වෙනම සෝදාගෙන සැනසිලා, නිකම් හිටිය. 

ඉතින් ඔන්න ඔහොම සෝචනීය තත්වයක ඉන්න අතරේ, අර ජෝඩුව මේ ගෙදරට ආපි. මට දැන් ටිකක් අප්සට්, වතුර බහින්නේ නැහැනේ බාත්රූම් එකේ. මගේ කොණ්ඩේ ගැනත් මට ගිල්ටි, බාත්රූම් එක අපිරිසිදුයි වගේ තිබුනොත් හරි නෑ නේ. මම ඉතින් පුළුවන් විදියට ඕක ක්ලීන් කරලා තියලා, උදේ කැම්පස් එකට ගියා. ඒ ගිහින් ඉන්නකොටත් ඕක ඔලුවේ වැඩ කරන නිසා, මම නිකම් ගූගල් කරලා බැලුවම, මෙන්න මේ ගැජට් එක දැකලා, ඕඩර් කළා.


ඕඩර් කරපු ගැජට් එක. 

හවස ගෙදර එනකොට ජෝඩුව ඉන්නවා ගෙදර. එදා වැලන්ටයින් දවසේ හවස. ඉතින් මම කතා කර කර ඉන්න ගමන් කිවුව 

"අනේ බාත්රූම් එකේ වතුර බහිනවා හොරයි, මගේ කොණ්ඩේ හිරවෙලා වෙන්න ඇති. මම පොඩි ගැජට් එකක් ඕඩර් කළා, ඒක එන්න ටික දවසක් යයි හැබැයි" කියල. එතකොටත් ඒ ගෑණු ළමය මගේ හිත හැදෙන්න වගේ කිවුව,

"අයියෝ ගණන් ගන්න එපා, ඒක මෙයා බලාගනීවි. ඔයාගේ කොණ්ඩේ ගැන අවුල් ගන්න එපා ඒක ලස්සනයි" කියල.

ඒ ගෑණු ළමයා එහෙම තමයි, හරිම මිත්‍රශීලී කෙනෙක්.

ඉතින් ඔහොම කතා කර කර ඉඳලා, මම උඩට ගියා වොෂ් එකක් දාගන්න. මෙන්න බොලේ බාත්ටබ් එක හොඳටම හෝදලා, වතුරත් බහිනවා. මම ඉතින් නාගෙන එහෙම පහලට ඇවිත්, අර බෑනාගෙන් ඇහුව,

"ඔයාද බාත්ටබ් එක සුද්ද කලේ? අනේ බොහොම ස්තුතියි" කියල. එතකොට ඔහු මෙන්න මෙහෙම පිළිතුරු දුන්න.

"ඔව් මම වොශ්‍ එකක් දාන්න ගියා, ඉතින් මට හිතුනා මගේ ගෑණු ළමයා වොෂ් එකක් දාන්න කලින් බාත්රූම් එක සුද්ද කරලා තිබ්බොත් හොඳයි කියල. ඉතින් ඒකයි, අත ප්ලන්ජ් එකක් වගේ හදලා තද කලාම වතුර ටිකත් බැහැලා ගියා, ගණන් ගන්නෙපා." කියල.

මම ඉතින් ඒ ළමයට මුව නොසෑහෙන්න ස්තුති කරලා, යාලුවෙක් කෝල් කලාම එයාටත් ඔය විස්තරේ කිවුව. එතකොට යාළුවා කියපු දෙයින් තමයි මම ටිකක් සංවේදී වුණේ.

"ඒ කියන්නේ මානවී එහෙනම් මේ එයාගේ තුන්වෙනි සහකාරිය උනාට ඉතින් ඇත්තටම ආදරයක් ඇති නේද හිතේ. නැත්නම් ඉතින් අපේ මිනිස්සු නම් ඔන්නොහෙ ගෑනිටම අස් කරගන්න ඇරල එනව මිසක් කවදාවත් බාත්රූම් එක සෝදලා තියයිද නේ?"

ඇත්තටම යාළුවා කියනකම් මම ඔය ප්‍රශ්නේ දිහා ගෑනු පිරිමි විදියට වෙන් කරලා හිතල තිබුණෙ නෑ. මම ඒ ගැන හිතුවේ guest and host විදියට විතරයි. මේ සිදුවීමේදී අර ගැහැණු කෙනා guest නිසා, host වෙච්චි පිරිමි කෙනා බාත්රූම් එක සෝදන එක සාමාන්‍ය දෙයක් විදියටයි මට හිතුණෙ. මට එතන තිබුණු අප්සට් එක තමයි මගේ කොණ්ඩේ නිසා මේ අවුල ඇතිවුණු එක.

මානවී ඉතින් එක ගෙදරක සහකරුවෙක් එක්ක ජීවත් වෙලා නෑ, ඒ නිසා ඕවා වැඩිය දන්නේ නෑ. හැබැයි ඉතින් කට්ටිය එකතු වෙලා උයාගෙන කාපු වෙලාවට එහෙම, 

"මානවී ඉවුවනේ, මම අස් කරන්නම්" කියපු යාළුවො තමයි මානවී ට ඉන්නෙ. ශ්‍රී ලාංකික, පිට කියල වෙනසක් නැතුව. කොටින්ම අපේ ගෙදරත් බාත්රූම් සෝදන්නේ තාත්ත. මම ඉතින් ඔහොම කල්පනා කර කර ඉන්නකොට, කලින් ජපානේ ඉන්නකොට සිදුවුණු දෙයක් මතක් වුණා.

මේකේ ඉන්නේ ශ්‍රී ලාංකික ජෝඩුවක්.

මේ ශ්‍රී ලාංකික ජෝඩුවේ පිරිමි ළමයා ඉන්නේ අපේ ඩිපාට්මන්ට් එකේ (අපි එයාට විශ්ව කියමු). ගෑණු ළමයා (අපි එයාට ශලිනි කියමු) හිටියේ ටිකක් ඈතක තියන විශ්ව විද්‍යාලයක. මේ විශ්ව එහෙම රොමැන්ටික් චරිතයක් බව කවදාවත් පෙනුනේ නැහැ, කපල් ෆොටෝ එකක් වත් ෆේස්බුක් දාල නැති, අපි ඉස්සරහ දෙන්නට දෙන්න බයිට් කරගන්න, බැනගන්න ජෝඩුවක් මේ. හැබැයි විශ්ව, ෆේස්බුක් එකේ ප්‍රොෆයිල් පික්චර් එකේ නොදැම්මට, එයාගේ වොලට් එකේ ශලිනි ගේ ෆොටෝ එකක් දාන් ඉන්නෙ. කොහොමහරි ෆීල්ඩ් විසිට් ගිහිපු වෙලාවක, ඇමරිකන් කෙල්ලෙකුයි, බන්ගලාදේෂි කෙල්ලෙකුයි මේක දැකල මගෙන් මෙහෙම ඇහුව.

"අනේ විශ්ව හරිම හොඳ සැමියෙක් නේ. ලංකාවේ හැම පිරිමියා ම මෙහෙමද?"

අපේ නම රැකගන්න ඕන අපිමයි නේ, ඉතින් මම කිවුව,

"ඔව් ඔව්, ගොඩක් අය එහෙමයි. ඉතින් එහෙම විශේෂයෙන් අහන්නේ ඇයි.. ඔයාලගේ රටවල් වල පිරිමි එහෙම නැද්ද?"

ඉතින් දවසක් අපි සෙට් එකක් කතා වුණා දකුණු සහ ගිනිකොණදිග ආසියානු කෑම තියන රෙස්ටුරන්ට් එකකට ගිහින් කමු කියල. මමයි, විශ්වයි ඇරෙන්න අනිත් අය විදෙස් රටවල් වල කට්ටිය. ඉතින් ඔන්න පිටත් වෙන වෙලාව කිට්ටු වෙන්නත් කලින්ම, විශ්ව යන්න නැගිට්ට.

"දැන්ම මොකෝ? අපි හයාමාරට නේ යන්නෙ?"

"ඔයාල හෙමීට එන්න. මම දැන් ටක් ගාල ගෙදර ගිහින් බත් එකක් රයිස් කුකර් එකේ ගහල එන්නම්"

"බත් ඇයි? ශලිනි එන්නේ නැද්ද?"

"නෑ අනේ. එයා එනකොට ටිකක් හවස් වෙනව කිවුව, ඉතින් අරුන්ට ඒ වෙනකම් බඩගින්නේ බලන් ඉන්න කියන්න බෑ නේ. එයා ගෙදර ගිහින් කයි. මම එන්නම් කට්ටිය එක්ක කන්න."

මුකුත් නොදන්න බබා පාට් එකේ මම මෙහෙම ඇහුව.

"ඉතින් ඔයා අපිත් එක්ක යමු, ශලිනි ගෙදර ගිහින් බත් එක උයාගෙන කයි නේ?"

"බෑ නේ, එතකොට බත් එක ඉදෙනකම් එයා බඩගින්නේ ඉන්න එපයි?"

ඔන්න ඔහොමයි මිත්‍රවරුනි. ආදරේ ඇත නුදුටු තැන්වල.


(කාටුන් ) ජෝඩුවක්. පින්තූරය Google වෙතින්.

මට හිතුණා මේක වැලන්ටයින් දවසේ බැරි වුනත්, වැලන්ටයින් මාසේ ඉවර වෙන්න කලින් ලියල තියන්න ඕන කියල.


මහා ලොකු බැඳීම් නොවෙන්න පුළුවන්, මහා ලොකු ගිවිසුම් නැති වෙන්න පුළුවන්, ඒත් ආදරේ ඕනෑම මොහොතක දැනෙන්න පුළුවන්.

ෆේස්බුක් එකේ, සහන් කසීර වික්‍රමසිංහ වැලන්ටයින් ඩේ එක වෙනුවෙන් ලියපු මේකත් කියවන්නකෝ


මාතෘකාවට යොදා ගත්තු "ආදරේ ඇත නුදුටු තැන්වල" කියන එක අහුලගත්තේ "කන්දක් සේ මා" චිත්‍රපටයෙන්. ඒකට ස්තුතියක් ලෙස, මම ෆිල්ම් එකේ ට්‍රේලර් එක ඇඩ් කරනවා මෙතන.





.. අර ගැජට් එක හොඳයිඒක වැඩ කළා හොඳට


16 comments:

  1. හා එකයි, දෙකයි, තුනයි කියල හතරට ගැනපං ...

    අර බෑණා නං අදහන්න වටින ගොබිලෙක් නෙව? වැලන්ටයින් කොහොම වෙතත් කැසනෝව නං ගැලපෙනවා. අර අපේ එකා නං හොඳා.

    මේ සාවියෙ අර ගැජමැටික් එකට කියන්නෙ ඩ්‍රේන් ස්නේක් කියලා. බලාන්ටකො ඒකෙත් හැටි? ඔහාට එනකොට ස්නේක් , වීසල් වෙලා.

    ReplyDelete
    Replies
    1. කිවුවත් වගේ කැසනෝව නම් ගැලපෙනවා තමා. හී..

      ඒ අපේ එකා ඇත්තටම හරිම හොඳ මනුස්සයෙක්. කැම්පස් එකේ විදෙස් සිසුවියෝ කොටට ඇඳන් ආවොත් සාමාන්‍යයෙන් අපේ කට්ටිය බලනවනේ ටිකක්. සමහරු කැත විදියටත් බලනවනේ. මේ මනුස්සය එහෙම වත් inappropriate දෙයක් කරනවා කියනවා මං දැකල නෑ.

      ඩ්රේන් ස්නේක් කිවුවම නිකම් ඩ්රේන් එක ඇතුලේ ඉන්න සර්පයෙක් වගේ. ඊට වඩා වීසල් හොඳයි. :) මට පොඩි කාලේ තිබුණු මර බයක් තමයි ටොයිලට් එකේ වාඩි උනාම ඒකෙ බටේ දිගේ සර්පයෙක් ඒ දෝ කියන එක. හිටපු ගමන් තාම හැරිලා බැලෙනවා, පුරුද්දට.

      Delete
  2. හිත සැනසෙන කථාවක්. බොහොම ස්තූතියි.

    ReplyDelete
  3. මාත් මෙහේ ආව අළුත ඔය වගේ ටබ් එකට උඩින් ෂවර් එක හයි කරපු බාත් රූම් එකක් තිබ්බ ගෙදරක හිටිය නිසා මං දන්නව ඒකෙ රඟේ. තමුන්ම නාපු වතුර උනත් හරිම අප්පිරියයි එහෙම නාපු වතුරෙ බැහැල ඉන්න උනාම. අපේ ගෙදර ගෑණු තුන් දෙනෙක් හිටියට මගේ කොණ්ඩෙත් කොට නිසා පොඩි දෙන්නගෙ දිග කොණ්ඩ වලින් තමයි ඔය වැඩේ වෙන්නෙ. මගේ වැඩේ ඒ දෙන්නා නෑවම හැමදාම කොණ්ඩ ගස් අදින එක වතුර බහින එක අස්සෙන්.

    අරකා මරු බෑණෙක්නෙ අනේ. හැබැයි මිනිහා හෙන ත්‍යාගශීලියෙක් වෙන්නත් ඕන. මොකද ලෝස් නැතුව හැම ගෑණිටම දරුවා ගානෙ දීල තියෙනවනෙ. එතකොට කවුරුවත් කියන්න එන්නෙ නෑ අරයට විතරයි දුන්නෙ මට නෑ කියලා.

    අපේ ගෙදරත් හැබැයි, අපේ මනුස්සයගෙ ඇඟේ රොමැන්ටික් බෝන් එකක්වත් නැති උනාට, මං වැඩ ඇරිලා එනකොට අපේ දූ ඩිංගලා කබඩ් එකේ තට්ටු ටික විතරක් ඉතුරු කරල තියෙන වෙලාවට මතක ඇතුව මට කන්න මොනව හරි ගෙනැත් තියනවා. ඒ වගේම වැඩට යන දවස්වල වැඩ ඇරිලා ඇවිත් පාටි වලට යන්න මං අකැමති බව දන්න නිසා එහෙම ගිහින් එන වෙලාවට මටත් කඩෙන් අරන් එනවා මොනවා හරි විශේෂ දෙයක්. බලන් යනකොට පට්ට රොමැන්ටික්නෙ ඈ? ;P

    ReplyDelete
    Replies
    1. මට පෙරේදා ඔයාව මතක් වුණා. :) උදේ නමයට ක්ලාස් එකක් තිබුණු නිසා අටට විතර ගෙදරින් එනකොට උෂ්ණත්වය බැලුවම 0 තිබුණු නිසා මම තික් ජැකට් එකයි, බූට්ස් නුයි දාන් ආවේ. දවල් වෙනකොට රස්නේ වෙලා හවස් වෙනකොට ආයේ සීතල වෙනවා කියල තමයි තිබුණේ, ඉතින් ගෙදර යන්නෙත් ටිකක් හවස් වෙලානේ.

      'දවල් බලනකොට නිවුස් වල තියනවා, පෙබරවාරි මාසේ වාර්තාගත උපරිම උෂ්ණත්වය අද වාර්තා වෙයි' කියල. බැලුවම එවෙලේ 17 යි අපට. මට කොහොමහරි හවස තිබුණු වැඩක් කැන්සල් වුණු නිසා මම වේලාසනින් කැම්පස් එකෙන් පිටත් වුණා, කල් දදා හිටපු වැඩක් කරගන්න හිතාගෙන. හරිම රස්නෙයි, දාඩියත් දානවා, හැමෝම බලනවත් එක්ක මගේ දිහා.

      පළවෙනියට එක බබයි, දෙවෙනියට බබාලා දෙන්නයි. එක පාරක් මාත් එක්ක කියනවා, 'අනේ මානවී මම පළමුවැනි බිරිඳට හැම මාසෙම පවුම් 500 ක් යවනවා, දෙවෙනියට පවුම් 1000 ක් යවනවා, ඉතින් මට හරි වියදම් අනේ' කියල. ඒ ඔය තුන්වැනියා මුණගැහෙන්න කලින්. දැන් මොනවා කරගනීවිද දන්නෙ නෑ.

      //අපේ ගෙදරත් හැබැයි, අපේ මනුස්සයගෙ ඇඟේ රොමැන්ටික් බෝන් එකක්වත් නැති උනාට//
      රොමෑන්ටික් බොන් නෑ කිවුවට හැංගිලා තියනවා නේ ඒ කියන්නේ? එහෙම තමයි හොඳ සැමියෝ.

      Delete
  4. Everyone of us has romantic feelings hidden away only how, why and when we display them differs...:)

    Really nice writing ..Thanks Maa'm

    ReplyDelete
  5. I just saw a hint (in a another Blog) that you probably went to Southlands in Galle Fort and my nostalgia start to run wiled. I had a Muslim girlfriend in Southlands (who lived in Galle Fort).

    ReplyDelete
    Replies
    1. Yes that's where I was schooled since grade 6 until I faced A/L exam in 2008. Actually we had lot of Muslim girls in our school.

      It is said that this song is written about a girl from Southlands College. Enjoy!

      https://www.youtube.com/watch?v=fRWrdLDSLp0

      Delete
  6. Thanks. Sunil R Gamage once said most of his songs are based on his real life experiences. As far as I know, he is not from Galle, however he must have been roaming around Gall fort (who knows).

    ReplyDelete
  7. අහම්බෙන්... කොටා ගෙන යනකොට හමු වුන සිත සැනසෙන කතාවක්.. ජය

    ReplyDelete
  8. ඔබට මූල්‍යමය උදව් අවශ්‍යද? ඔබ කිසියම් මූල්‍ය අර්බුදයක සිටිනවාද? නැතහොත් ඔබේම ව්‍යාපාරයක් ආරම්භ කිරීමට ඔබට අරමුදල් අවශ්‍යද? ඔබේ ණය පියවීමට හෝ බිල් ගෙවීමට හෝ හොඳ ව්‍යාපාරයක් ආරම්භ කිරීමට ඔබට අරමුදල් අවශ්‍යද? ඔබට අඩු ණය ලකුණු ප්‍රමාණයක් ඇති අතර දේශීය බැංකු සහ වෙනත් මූල්‍ය ආයතනවලින් ප්‍රාග්ධන සේවා ලබා ගැනීම ඔබට අපහසු ද? අපගේ සමාගමෙන් මූල්‍ය සේවා ලබා ගැනීමට ඔබට ඇති අවස්ථාව මෙන්න. අපි පහත සඳහන් මුදල් පුද්ගලයන්ට ලබා දෙන්නෙමු.
    * වාණිජ මූල්‍ය
    *පෞද්ගලික මූල්ය
    * ව්‍යාපාර මූල්‍ය
    ඉදිකිරීම් මූල්‍ය
    * ව්‍යාපාර මූල්‍ය සහ තවත් බොහෝ දේ:
    සහ තවත් බොහෝ දේ 3% පොලී අනුපාතයට;
    විද්‍යුත් තැපෑල හරහා අප අමතන්න: Personalloanesay@gmail.com

    ReplyDelete