April 18, 2022

තරුණ පරපුරේ බලාපොරොත්තු



From: https://www.istockphoto.com/vector/family-tree-with-elaves-gm650184406-118188415


 එංගලන්තයේ ලෝරන්ස් ඔලිවර් සම්මාන උළෙලේ හොඳම නළුවා වූ හිරාන් අබේසේකර කරන මේ කතාවේ 1:18 සිට අහන්න.


"මට සම්මානය ගැන සතුටුයි, හැබැයි ඒක නිකම් වලාකුළු ගොඩකින් වැහිලා තියෙන්නේ. අරගලයට සහභාගී වෙන්න තමයි ආවේ. නැත්නම් ඉතින් එන්න උවමනාවක් නැහැනේ."

මේ කතා කරන්නේ ශ්‍රී ලාංකීය තාරුණ්‍යයයි. ශරීරයෙන් කොහේ හිටියත්, හිතින් අනාගතය ගැන සිතා ලතැවෙන හිත් වල ඇති ශෝකයයි.

ග්‍රීසිය ආර්ථික අර්බුදයකට මැදි වුයේ මෑත අතීතයකදී ය. මගේ මිතුරියක් එරස්මස් ශිෂ්‍යත්වයක් ලබා යුරෝපයේ විද්‍යාපති උපාධිය හදාරන කාලයේ, මාස කිහිපයකට ග්‍රීසියේ අධ්‍යාපනය ලැබුවාය. ඇයට ආශ්‍රය කරන්නට ලැබුණු ග්‍රීක තරුණ පරම්පරාව තුළ බලාපොරොත්තු කඩවුණු බවක්, එදා දවස ගත කරනු විනා හෙටක් ගැන අදහසක් නැති බවක්, ඇයට දැනී තිබිණි.

පසුගිය කාලය පුරාම මේ බලාපොරොත්තු කඩ වූ ස්වරූපය අපේ තරුණ පරපුර තුළද හිස ඔසවමින් තිබිණි.

මීට මාස කිහිපයකට පෙර, රටේ සිදුවන අකටයුතුකම් පිලිබඳ සංවේදීතාවක් ඇති වූ විටක, කවර හේතුවක් නිසා හෝ අසංවේදී ව මුනිවත රකින සමාජය ගැන ඇති වූ කළකිරීම සමනය කරගෙන මගේ හිත හදාගන්නට, මම ලියා තැබූ පද පෙළක් පහතින් ලියමි.


පුතේ නුඹ නිදන්න - සදහටම නිදන්න 

දෙනෙත් හැර බලන්නට - නුඹට නොමැතිය රටක් 

හීනයක් මවන්නට - නුඹට නොමැතිය හෙටක් 


අතට ලැබෙනා මුදල් ගනිමින් සියලු තීරණ ගනු පෙනේ 

නිධන් වන් සිඳු දුරින් යන නැව් වෙතට විකිණී ගිනිගැනේ 

ලෙයින් වෙනසක් නොවූ සොයුරන් අතර වෛරය පැතිරුණේ 

ණය ගෙවන්නට ගත් ණයෙන් කොටසක්, හොරෙන් අරගනු පෙනේ 


දිලින්දන් සිඟමන් යදින විට පොහොසතුන් සක්විති වෙලා 

වීරයින් නිහඬවී සිර කොට කැනහිලුන් බලවත් වෙලා 

පෑගුනිද මංමුලා වැල්, රට වැසියනුත් ඇත හිනැහිලා 

ශාපලත් දේශයක ඉපදී කඳුළු සලමින් ඉමු බලා 


මම ගත කරන්නේ ගැහැණියක් දරුවන් වදනා වයසයි (childbearing age). මගේ ඇතැම් මිතුරියන් මවුවරු වන අතර, ඔවුන් බහුතරය දරුවන්ගේ හෙට දවස ගැන සංකාවෙන් පසු වේ. ඒ ඇතැමුන් දරුවන් ගැන සිතමින් විදෙස්ගත වීමට පෙරුම් පුරනා අතර, මවුවරුන් නොවූ අනිත් පිරිස, දරුවන් හදම්දෝ නොහදම්දෝ යන දෙගෙඩියාවෙන් පසුවන්නේ, මෙවන් රටක ණයකාරයෝ කරන්නට දරුවන් හදන්නේ කුමටදැයි සිතමිනි.

ශ්‍රී ලාංකික තරුණ පරපුර, බලාපොරොත්තු කඩ කර නොගෙන, සාමකාමී අරගලයකට පිවිසීම, ප්‍රගතිශීලී දෙයක් වන්නේ එනිසාය. හෙට දවස වෙනුවෙන් සටන් කරනා මානසිකත්වයක, ධනාත්මක අදහස් හා ශක්තිමත් බවක් ඇත. රටක් ගොඩනැගිය හැක්කේ ඔවුන්ට ය. හෙටක් ගැන බලාපොරොත්තු නැතිව මළවුන් සේ ජීවත් වන මානසිකව අවපීඩිත තරුණ පරපුරක් නොවී, අරගල කරනා තරුණ පරපුරක් දැකීමට අප වාසනාවන්ත වී ඇත. එය එසේ පවතීවා යන්න මගේ පැතුමයි.

කසුන් කල්හාර ගේ අපූරු සංගීතයෙන් හැඩ වූ මේ ගීතය අහමු.










April 06, 2022

නින්ද අහිමි කරන හීන

 රටේ අම්මා වගේ හිටපු, ඇති උතුම් සේවයක් කරපු නිරූපමා රාජපක්ෂ මැතිණිය විදෙස්ගත වෙලා. බලන්න ඉතින් රට බේරාගත්තු අයගේ පවුල් වල අයට මේ රටේ කළගුණ නොදත් ජනතාව ඉන්න නොදෙන හැටි. එතුමිය කිසිම වරදක් කරලත් නැතිකොට, නිර්භීත පරම්පරාවක කෙනෙකුත් වෙච්චි කොට, මෙහෙ ඉන්න තිබුණෙ, කඩාකප්පල් කාරයන්ට උණ ගැනෙන්නත් එක්ක.


කඩාකප්පල් කාරයෝ ගැන හිත හිත ඉන්නකොට, දන්නෙ නැතුවම ඇස් පියවුණා..


එකපාරටම ලොකු එළියක් ආවා. නිල්, කහ, රතු, සුදු, තැඹිලි, පාට පාටින් වට පිට දිලිසුනා. මිහිරි පිච්චමල් සුවඳක් හැම තැනකම පැතිරී ගියා. රත්තරන් පාට දිලිසෙන රූපයක් හෙමින් මතුවුණා. හරිම මිහිරි ලස්සන හඬින්, දේශනාවක් පටන් ගත්තා.


"සියලු දෙනාට සමානව මෛත්‍රිය පතුරුවන්න. පන්සිල් රකින්න. කිසිම කෙනෙකුගේ ජීවිත වලට හානි කරන්න එපා. සොරකම් කරන්න එපා. වැරදි කාමසේවනයේ යෙදෙන්න එපා. බොරු කියන්න එපා. සුරාපානය කරන්න එපා."


"අනේ යන්න අනේ යන්න.", එකපාරටම පැත්තකින් ගඳ ගහන රූපයක් ඇවිත් අර මිහිරි දේශනයට බාධා කළා.


"ඔබ බටහිර NGO කාරයෙක්. අපේ නිර්මල බුදු දහම විනාශ කරන්න ආපු කෙනෙක්. එහෙම හැමෝටම මෛත්‍රී කරලා බුදු දහම රකින්න බෑ. අන්‍යාගමිකයින් කෑලි කෑලි වලට කපන්න ඕන, අනික අපට හොරකම් කරන්න එපා කියන්න ඔබතුමා කවුද? ගෑණු සීයක් විතර එක්ක නිදියගත්තේ නැති උන් කොහොමත් අදාළ නෑ, උන් පිරිමි නෙවෙයි, අනික ප්‍රෞඪ පෙනුමක් තියන ආරෝහ පරිණාහ පෙනුම තියන අයට ගෑණු ඕන තරම් ආකර්ෂණය වෙනවා, ඒවා නොදැක්ක වගේ ඉන්නවා නම් ඌ කොහොමත් පිරිමියෙක් වෙන්න බෑ. බොරු කියන එක අපේ වැඩක් ඒක ඔබ ප්‍රශ්නයක් කරගන්න එපා. අනික බාර් පර්මිට් එකක් දෙකක් නොදී කොහොමද අපි සිංහල බෞද්ධ ඡන්ද ටික අරන් මේ ආගමයි ජාතියයි රකින්නෙ? සරලවම මෙච්චරයි, ඔබතුමා NGO කාරයෙක්. බටහිරෙන් එන පිල්ලි අපට අදාළම නෑ, අපි මරාගෙන මැරෙන්නේ මේ රට, ජාතිය හා ආගම වෙනුවෙන්. ඔබට බෑ අපිව නවත්තන්න."


එක පාරට මට ඇහැරුණා. ඔලුව රිදෙනවා හොඳටම. කොට්ටේ ටිකක් හදාගෙන, අනිත් පැත්ත හැරිලා මම ආයේ නිදා ගන්න උත්සාහ කළා.


එකපාරටම විශාල සද්දයක් ඇහුණා. ආයුබෝවේවා මහරජාණනි කියල සින්දුවක් ඇහෙන්න ගත්තා. උස, ලස්සන ප්‍රතාපවත් පෙනුමක් තියන, සුදු සරමක් හා කමිසයක් ඇඳපු, රතු පාටින් සාටකයකුත් කර වටේ දාපු, උඩු රැවුලක් තියන, කෙනෙක් ආවා.


"මට මේ රටේ මිනිසුන්ගෙන් සමාව ගන්න අවශ්‍යයි. මම ඉතා විශාල මුදලක් කොමිස් විදියට අරගෙන තියනවා. තවත් විශාල මුදලක් සොරකම් කරලා තියනවා. මට ඉතා විශාල පසුතැවීමක් දැනෙනවා, කොටින්ම මම මැරුණට පස්සේ මට මොනවා වෙයිද කියලත් මට බයයි. කරුණාකරලා ඒ මුදල් ටික ආපහු බාර දීලා, හිත නිදහස් කරගෙන මට මැරෙන්න ඉඩ හදා දෙන්න, මට සමාවෙන්න."


"මේ මොකද මේ වෙලා තියෙන්නෙ?", එකපාරටම පැත්තකින් අර කලින් ආපු ගඳ ගහන රූපයම ඇවිත් අර කතාවට බාධා කළා.


"ඔබතුමාගේ සිහිය විකල් වෙලාද? ඔබතුමා කවද්ද සොරකම් කළේ? ඔබ කවදාවත් සොරකම් කරලා නැහැ, සොරකම් කලේ වෙන වෙන අය. අනිත් අය සොරකම් කරලා ඒකට ඔබේ නම පටලපු එක තමයි හැමදාම සිදු වුණේ. දැන් උනත් ඔබතුමාට මේ කවුරුහරි අනවශ්‍ය බලපෑමක් කරලා. නැත්නම් ඔබතුමාගේ සිහිය විකල් වෙලා. ඔබට බලපෑම් කලේ කවුද කියන්න, කෑලි කෑලි වලට කපනවා උන්ව. ඔබතුමා හොඳින් කෙලින් ඉන්න ඕන, බලපෑම් වලට යටත් වෙලා කොහොමද?"


ආයෙත් මට ඇහැරුණා. දැන් නම් ඔලුව කැක්කුම හොඳටම වැඩියි. මම නිදියගන්නා අදහස අත්හැරියා..


පසුගිය දවස් වල කතාබහට ලක්වුණු ඔස්කාර් සම්මාන උළෙලේ best picture විදියට සම්මානිත, CODA චිත්‍රපටය apple tv එකේ බලන්න පුළුවන් කියලා නොටිෆිකේෂන් එකක් ඇවිත් තිබුණා.. නිදාගන්න අදහස අත් ඇරපු නිසා  මම ඒක බලන්න පටන් ගත්තා.


ඒ චිත්‍රපටය ලස්සනයි. මම කොහේ හරි දැක්කා, කලාත්මක චිත්‍රපටයක් කොතනදී pause කලත් ඒ රාමුව ලස්සනට තියෙන්න ඕන කියල කතාවක්. මම ෆිල්ම් බලන්නේම නැති තරම්. වැඩිපුරම ආස නිදා ගන්න නිසා, අමුතු හීන පෙනිලා නිදාගන්න බය හිතෙන දවසක විතරයි මම චිත්‍රපටි බලන්නෙ. මම එහෙම බලපු අතලොස්සක් චිත්‍රපටි අතරෙන්, Pride and Prejudice (2005) චිත්‍රපටයට පස්සෙ දැකපු, ඒ ලක්ෂණය තියනවා යයි මට හිතුණු ලස්සන චිත්‍රපටයක් CODA. CODA කියන්නේ Child Of Deaf Adults කියන තේරුම. ධීවර පවුලක ඉන්න එකම දියණිය හැරුණම, ඇගේ දෙමවුපියනුත්, සහෝදරයාත්, බිහිරියි, ඔවුන්ට කතා කරන්නත් බෑ. ඉතින් මේ දියණිය තමයි ඔවුන්ගේ නිල නොලත් පරිවර්තක. ඇය සංගීතයටත්, ගායනයටත් ආසයි, නමුත් ඇගේ පවුලේ කිසිවෙකු සංගීතය හෝ ගායනය යනු කුමක්දැයි හරියටම දන්නේ නැහැ. ඔවුන්ගේ ජීවන අරගලයත්, ඇය වෙනුවෙන් උදවුවට ඉදිරිපත් වෙන පාසලේ සංගීත ගුරුතුමා ගේ උත්සාහයත් සමග දිව යන කතාව අවසන් වෙන්නේ, මේ දියණිය Berklee College of Music හි අධ්‍යාපනය ලබන්න ශිෂ්‍යත්වයක් දිනා ගැනීමෙන්.

සිංදුවකුත් අහමුද? 








November 03, 2019

[නවාතැන්පොළේ කතා / Home away from home - 03] මාස්ක් සහ ජංගි කතා

මෙහේ ඉතින් සීත කාලෙට, අපි දවල් දවසේ රැකියාවන් වලට එහෙම එලියට යනකොට ගොඩක් ඇඳුම්, කෝට්, ජැකට්, එක උඩ එක ඇඳගෙන, බූට්ස්, මේස්, ග්ලවුස්, තොප්පි දාගෙන, මුළු ඇඟම වැහෙන විදියට නේ යන්නෙ. ඉතින් ස්වාභාවිකවම, හවසට ගෙදර එනකොට, බොහෝ විට හැමෝම එන්නේ අර ඇඳුම් ටික ගලවන්න බලාගෙන. ඒ වගේම රෑ නිදියනකොට මහ ගොඩක් ඇඳුම් අඳින්න කැමති නෑ ගොඩක් අය. හීටිං දාගෙන, බ්ලැන්කට් පෙරවාගෙන, සැහැල්ලු ඇඳුමක් ඇඳන් නිදියන්න තමයි ගොඩක් වෙලාවට හිතෙන්නෙ. ඉතිං මගේ ගෙහිමියත් එහෙම තමයි.

සමහර දවසට මට උයන්න රෑ උනාම, කාල ඉවර වෙලා අස් කරන වෙලාවට ගෙහිමියා එනව කුස්සියට, වතුර ටිකක් එහෙම බොන්න. ඒ වෙද්දි එයාල කාල බීල ඉවර වෙලා, ඇඳට ගිහින් ෆිල්ම් එකක් වගේ බලන වෙලාව. ඉතින් මෙහෙම රෑ වෙලා කුස්සියේ කවුරුවත් ඇති කියල ගෙහිමියා වැඩිය බලාපොරොත්තු වෙන්නේ නැති නිසා, සමහර දවසට එයා එන්නේ ජංගි පිටින්.

යට ඇඳුම් පමණක් ඇඳපු පිරිමි පරාණයක් ඉහත රූපයේ දැක්වේ. රූපය ගත්තේ Google Images වලින්.


අපේ ගෙහිමියා හරිම වයසයි, ඒ මදිවට එයා සමලිංගික පිරිමි කෙනෙක්. ඒ නිසා ගෑණු කෙනෙක් වෙච්ච මම ගැන එයාට විශේෂ හැඟීමක් නැති බව මම හොඳින්ම දන්නව. ඉතින් ඔය ජංගි පිටින් කුස්සියට එන එක වැරදි චේතනාවකින් කරන දෙයක් නොවන බව මට හොඳටම පැහැදිලි නිසා, මට ඒක ගානක් නෑ. ඊටත් මම පුංචි කාලේ ඉඳන් හැදුනේ වැඩුනේ වැලිගම නිසා, පාරේ ගියත්, බීච් එකට ගියත්, පොලට ගියත්, අඩ නිරුවත් සුද්දො, බිකිනි ඇඳපු සුද්දියෝ, අපට නිතරම දකින්නට ලැබුණ. ජපානේ ගියාට පස්සේ, අනිත් ගැහැණු සමග නිරුවතින් අපි ඔන්සෙන් ගියා.

හැබැයි ඉතින් ගෙහිමියා ජංගි පිටින් ඉන්න එක මට අව්ලක් නැති උනාට, මම කුස්සියට යනවා නම් සාමාන්‍යයෙන් සංවර ඇඳුමක් තමයි ඇඳගෙන ගියේ, ගෙහිමියගේ බෑනා සහ ඔහු හමුවෙන්න ගෙදරට ආපු අය ටිකක් තරුණ නිසා. මේ තරුණ පිරිස උනත් ඉතින් එහෙම අවසරයෙන් තොරව වැරදි දේවල් කරන අය නෙවෙයි, ඒත් ඉතින් හොඳ impression එකක් ඇති වෙන විදියට හිටියම අපට පහසුයි නේ?

හැබැයි එක දවසක් මම කොට night dress එකක් ඇඳන් ඉඳලා, ඕක දැකලා ගෙහිමියා කියාපි "හානේ ඔයා හැඩයි" කියල. ඒ වගේම ගෙහිමියා ජංගි පිටින් ඉන්නකොට මම එයාව දැක්කොත් එයාට අප්සට් යන්නේත් ලජ්ජාවට එහෙම නෙවෙයි, එයාගේ බඩ ගෙඩිය සහ (එයා කියන විදියට) out of shape සිරුර මට පේන නිසා. :D

ඉතින් ඒ වෙලාවට එයා කියනවා, "සොරි මානවී, මගේ ඇඟ ඉතින් එච්චර හැඩ නෑ" කියල. :D

හැබැයි ඇත්තටම එයා තරුණ කාලේ හරිම කඩවසම් කෙනෙක්. මම පින්තූර වලින් දැකල තියනව. :)

ඉතින් මේකයි සිද්දිය. මම සාමාන්‍යයෙන් සති දෙක තුනකට සැරයක් වගේ, බියුටි කචල් මාස්ක් එකක් පාවිච්චි කරනවා. මේක charcoal වලින් හදපු මාස්ක් එකක්. ඔය පහල පින්තූරෙ උඩ පේලියේ මැදින් තියෙන්නේ charcoal මාස්ක් එක. ඉතින් කළු පාටයි මේක මූණෙ ගෑවම හොඳේ. මේක පාවිච්චි කරනකොට, කරන්න තියෙන්නේ, උණු වතුරෙන් පොඟවලා ගනිපු තුවායකින් මූණ ටිකක් තෙත මාත්තු කරලා, ටියුබ් එකෙන් මේ කළු පාට ක්‍රීම් එක අරන්, මූණේ ඇස් අවට හා තොල් වල නොගෑවෙන්න ගැන එක. වාතයට නිරාවරණය උනාම, මේ ක්‍රීම් එක වේලෙනවා. ඉතින් මේක වේලෙන කම් ඉඳලා, වේලුනාට පස්සේ හම වගේ ඇදලා ගලවලා දාන්න ඕන. 

එක එක ජාතියේ මාස්ක් වර්ග ඉහත රූපයේ දැක්වේ. රූපය ගත්තේ Google Images වලින්.

මම සාමාන්‍යයෙන් මේක ගෑවම කරන්නේ, වේලෙනකම් කාමරේ ඇතුලට වෙලා ඉඳල, ගලවලා, මූණ හෝදගෙන මිසක් එලියට බහින්නෙ නෑ. කළු පාට නිසා. නමුත් එක දවසක් මම මේක පාවිචිච් කරද්දී ටිකක් වැඩිපුර රෑ වෙලා තිබුණෙ, හැමෝම නිදි. මේ වෙලාවට ඕක දැකල බයවෙන්න කවුරුවත් එන එකක් නෑ කියල හිතල, මම මාස්ක් එක වේලෙනකම් කුස්සියට ගියා වතුර බෝතලේ පුරවන් එන්න.

එතකොටම, කුස්සියේ අනිත් පැත්තේ දොරෙන් ඇතුළු වුණා ගෙහිමියා. ඒ වෙලාවේ එයා ජංගිය විතරයි ඇඳල හිටියෙ. එයත් වතුර බොන්න හරි මොනවට හරි එන්න ඇති. මම ඉතින් දැන් ගෙහිමියාගේ පැත්තට මූණ හරවන්නේ නැතුව ඉඳන්, "මම මාස්ක් එකක් දාගෙන ඉන්නෙ, මූණ දැකල බය වෙන්නෙපා" කියල කියන්න උත්සාහ කරනවා දිගින් දිගටම. නමුත් ගෙහිමියාට මම කියන දේ ඇහෙන්නේ නැහැ, ඒ මොකද කියනවා නම්, ඔහු ඊට වඩා සද්දෙන් මගෙන් සමාව අයදිනවා. "අනේ සොරි මානවී, රෑ වෙලා නිසා මම හිතුවේ කුස්සියේ කවුරුවත් නැතුව ඇති කියල, ඒකයි ජංගි පිටින් ආවෙ, මම ඉක්මනටම වතුර අරන් යන්නම්, අනේ සමාවෙන්න, මම ඉක්මනින් යන්නම්" කිය කිය. එයා හරිම embarassed. ඒ නිසා එයා nonstop සමාව අයදිනවා දැන්. කොටින්ම එයා හුස්ම ගන්න වත් කතාව නවත්තන්නේ නැති නිසා, මම කියන දේ අහන්න එයාට ඉස්පාසුවක් නැහැ. ඉතින් මම මාස්ක් එකක් දාගෙන ඉන්න බව කිවුවට, එයාට ඇහෙන්නේ නැහැ. (ඒ මදිවට එයාගේ කටහඬ මට වඩා ගොඩක් සද්දයිත් එක්ක) සමහර විට, මම මාස්ක් එක පේනවට ඒ පැත්තට මූණ හරවන්නේ නැතුව ඉන්නකොට, එයාට හිතෙන්න ඇති එයාගේ ජංගිය නිසා මම uncomfortable වෙලා කියල. අහක බලන් කතා කරනකොට, කොහොමත් වැඩිය සද්දෙන් ඇහෙන්නේ නැහැනෙ.

ඔහොම ඇවිත් එයා මගේ එහා පැත්තෙන් හිටගෙන සැන්විච් එකක් හදන්න පටන් ගත්ත. මමත් එතකොටම, "I am wearing a mask" කියාගෙනම එයාගේ පැත්තට හැරුණ. ගෙහිමියා මගේ දිහා බලල, එක පාරට ගැස්සුණ. එහෙම ගල් ගැහිල ටිකක් වෙලා ඉඳලා, nonstop හිනා වෙන්න පටන් ගත්ත.



February 23, 2019

ආදරේ ඇත නුදුටු තැන්වල

පහුගිය දවස් වල අපේ බාත්රූම් එකේ වතුර බහින නළය ටිකක් හිර වෙලා තිබුණ. අපේ බාත්රූම් එක කිවුවේ, මේක මම තනියම පාවිච්චි කරන එකක් නෙවෙයි, අපේ ගෙහිමියාගේ බෑණා (අක්කගෙ පුතා) එක්ක මම මේක ශෙයා කරනවා.

ශෙයා කරනවා කිවුවට ඇත්තටම ඒක ටිකක් වාසි ඩීල් එකක්. මම මේ කාමරේට කැමති වෙන්නත් ඒක එක හේතුවක්. මේ බෑණා රැකියාව උදෙසා දිවයිනේ හැමතැනකම වගේ ඇවිදින්න යනව. එයාගේ නිවහන සහ පවුල ඉන්නේ එංගලන්තයේ දකුණු දිගට වෙන්න. නමුත් හෙඩ් ඔෆිස් එක තියෙන්නේ මධ්‍යම එංගලන්තයේ (Midlands). ඉතින් හෙඩ් ඔෆිස් එකට ආපුවම, සතියට දවසක් හෝ දෙකක් තමයි මේ බෑණා මම ඉන්න ගෙදර නවතින්නෙ. අනිත් හැම දවසකම වගේ ඔහු එක්කෝ රැකියාව එක්ක ඇවිදිනවා, නැත්නම් දකුණු එංගලන්තයේ තියන නිවහනට වෙලා ඉන්නව. ඉතින් බාත්රූම් එක ශෙයා කරනවා කියල කිවුවට, ඇත්තටම සතියේ වැඩි දවසක් ඒක මගේ විතරයි, නමුත් මේ කාමරේ ගාස්තුව, ඇටෑච් බාත්රූම් එකක් තියන කාමරේකට (en suite) වඩා සෑහෙන්න අඩුයි. කෝමහරි මේ බෑණගෙයි මගෙයි වචන වලින් නොකී ගිවිසුමක් වගේ, අපි ඕක බොහොම පිරිසිදුවට තියන් හිටිය. විශේෂයෙන්ම ටොයිලට් සීට් එක කවදාවත් ඒ මනුස්සයා සවුත්තු කලේ නෑ.

මේ බෑණාට ඉන්නවා දරුවෝ තුන් දෙනෙක්. පළමු රිලේෂන්ශිප් එකෙන් එක්කෙනයි, දෙවෙනි රිලේෂන්ශිප් එකෙන් එක්කෙනයි, තව එක්කෙනෙක් ඔන් ද වේ. ඔහොම ඉන්නකොට මේ සති කීපයක් උඩදී, මේ මනුස්සය තව ගැහැණු කෙනෙක් එක්ක සෙට් වෙලා, ගෙදරට එක්කගෙන ආව. ගෙදර අනිත් අයත් හරිම ආදරෙන් කතා කර කර ඉන්නවා දැන් අලුත් ජෝඩුව එක්ක. මට මේක දැක්කම දැන් හරිම ඔඩ් ඉතින්, ටිකක් දුකයි. අර මනුස්සයා දරු ගැබක් දරන් ඉන්නකොට මෙයා මෙහෙම හැසිරෙන එක හරිද? අපි ඉතින් ගෑණු නේ. සාමාන්‍යයෙන් පිරිමි කෙනෙක් ඔහොම ඉන්නවා දැක්කම මාළු නටනව නේ ඇඟේ. :D

හැබැයි අර අලුත් ගෑණු කෙනා හරිම විනෝදකාමී, අහිංසක කෙනෙක්. මාත් එක්ක යාලු උනා හරිම ඉක්මනට.

ඉතින් මම පටන් ගන්නකොටම කිවුවනේ බාත් ටබ් එකේ වතුර බහින නළය හිර වුණා කියල. මට හේතුව විදියට හිතුනෙම, මගේ කෙස් ගස් ඔය නළය අස්සේ හිරවෙලා ඇති කියල. මම හැමදාම නෑවට පස්සේ ඩ්රේන් කැප් එක උඩ තියන කෙස් ගස් ටික අරන් ඉවත් කරනව, නමුත් ඉතින් ඒකෙ සිදුරු වගේ තියන නිසා කෙස් ටිකක් විතර ඕක අස්සට යනවා ඇති. මගේ කොන්ඩෙත් ටිකක් ගණකම් කැරලි සහිත නිසා, කැරලි ගැහිලා හිර වෙලා ඇති.


මානවී වගේ කොණ්ඩයක් තියන ළමයෙක් නාන පින්තූරයක්. පින්තූරය https://www.wikihow.com/Care-for-Your-Curly-Hair වෙතින්.

ෂවර් එක සවි කරලා තියෙන්නේ බාත් ටබ් එකට උඩින් නේ. ඉතින් ඇඟ හෝදන නාන හැම වෙලාවකම, වතුර පිරෙනවා බාත් ටබ් එකේ, වළලුකර ට ටිකක් පහලට වෙන්න විතර. ඊට පස්සේ හෙමින් හෙමින් වතුර බැස්සට, අර සබන් ගතියත් එක්ක කුණු වගේ බාත් ටබ් එකේ පතුලේ ගෑවිලා තියනවා. පිරිසිදු කරන්න ටිකක් කරදරයි, මොකද බාත්ටබ් එකේ පතුල හෝදන්න වතුර දැම්මම, ඒ වතුර ටිකත් බහින්නේ නැතුව රැඳෙනවා නේ.

මම දවසක් ඕක සුද්ද කරන්න ගිහින්, උඩ තට්ටුවේ බාත්රූම් එකේ වතුර ටිකක් ලීක් වෙලා, ඒ වතුර ටික පහල තට්ටුවේ වහල හෙවත් ස්ලැබ් එකේ සවි කරපු ලයිට් එකක් අස්සෙන් බිමට වැටිලා, ට්‍රිප් එක ගියා. එදා ඉඳන් මම ඕක සුද්ද කරන වැඩේ අත ඇරලා දැම්ම, සමනල් පිහාට්ටක් අතගානවා වගේ පරිස්සමට නාගෙන, බාත්ටබ් එකෙන් එලියට ඇවිත් ආයේ කකුල් දෙක වෙනම සෝදාගෙන සැනසිලා, නිකම් හිටිය. 

ඉතින් ඔන්න ඔහොම සෝචනීය තත්වයක ඉන්න අතරේ, අර ජෝඩුව මේ ගෙදරට ආපි. මට දැන් ටිකක් අප්සට්, වතුර බහින්නේ නැහැනේ බාත්රූම් එකේ. මගේ කොණ්ඩේ ගැනත් මට ගිල්ටි, බාත්රූම් එක අපිරිසිදුයි වගේ තිබුනොත් හරි නෑ නේ. මම ඉතින් පුළුවන් විදියට ඕක ක්ලීන් කරලා තියලා, උදේ කැම්පස් එකට ගියා. ඒ ගිහින් ඉන්නකොටත් ඕක ඔලුවේ වැඩ කරන නිසා, මම නිකම් ගූගල් කරලා බැලුවම, මෙන්න මේ ගැජට් එක දැකලා, ඕඩර් කළා.


ඕඩර් කරපු ගැජට් එක. 

හවස ගෙදර එනකොට ජෝඩුව ඉන්නවා ගෙදර. එදා වැලන්ටයින් දවසේ හවස. ඉතින් මම කතා කර කර ඉන්න ගමන් කිවුව 

"අනේ බාත්රූම් එකේ වතුර බහිනවා හොරයි, මගේ කොණ්ඩේ හිරවෙලා වෙන්න ඇති. මම පොඩි ගැජට් එකක් ඕඩර් කළා, ඒක එන්න ටික දවසක් යයි හැබැයි" කියල. එතකොටත් ඒ ගෑණු ළමය මගේ හිත හැදෙන්න වගේ කිවුව,

"අයියෝ ගණන් ගන්න එපා, ඒක මෙයා බලාගනීවි. ඔයාගේ කොණ්ඩේ ගැන අවුල් ගන්න එපා ඒක ලස්සනයි" කියල.

ඒ ගෑණු ළමයා එහෙම තමයි, හරිම මිත්‍රශීලී කෙනෙක්.

ඉතින් ඔහොම කතා කර කර ඉඳලා, මම උඩට ගියා වොෂ් එකක් දාගන්න. මෙන්න බොලේ බාත්ටබ් එක හොඳටම හෝදලා, වතුරත් බහිනවා. මම ඉතින් නාගෙන එහෙම පහලට ඇවිත්, අර බෑනාගෙන් ඇහුව,

"ඔයාද බාත්ටබ් එක සුද්ද කලේ? අනේ බොහොම ස්තුතියි" කියල. එතකොට ඔහු මෙන්න මෙහෙම පිළිතුරු දුන්න.

"ඔව් මම වොශ්‍ එකක් දාන්න ගියා, ඉතින් මට හිතුනා මගේ ගෑණු ළමයා වොෂ් එකක් දාන්න කලින් බාත්රූම් එක සුද්ද කරලා තිබ්බොත් හොඳයි කියල. ඉතින් ඒකයි, අත ප්ලන්ජ් එකක් වගේ හදලා තද කලාම වතුර ටිකත් බැහැලා ගියා, ගණන් ගන්නෙපා." කියල.

මම ඉතින් ඒ ළමයට මුව නොසෑහෙන්න ස්තුති කරලා, යාලුවෙක් කෝල් කලාම එයාටත් ඔය විස්තරේ කිවුව. එතකොට යාළුවා කියපු දෙයින් තමයි මම ටිකක් සංවේදී වුණේ.

"ඒ කියන්නේ මානවී එහෙනම් මේ එයාගේ තුන්වෙනි සහකාරිය උනාට ඉතින් ඇත්තටම ආදරයක් ඇති නේද හිතේ. නැත්නම් ඉතින් අපේ මිනිස්සු නම් ඔන්නොහෙ ගෑනිටම අස් කරගන්න ඇරල එනව මිසක් කවදාවත් බාත්රූම් එක සෝදලා තියයිද නේ?"

ඇත්තටම යාළුවා කියනකම් මම ඔය ප්‍රශ්නේ දිහා ගෑනු පිරිමි විදියට වෙන් කරලා හිතල තිබුණෙ නෑ. මම ඒ ගැන හිතුවේ guest and host විදියට විතරයි. මේ සිදුවීමේදී අර ගැහැණු කෙනා guest නිසා, host වෙච්චි පිරිමි කෙනා බාත්රූම් එක සෝදන එක සාමාන්‍ය දෙයක් විදියටයි මට හිතුණෙ. මට එතන තිබුණු අප්සට් එක තමයි මගේ කොණ්ඩේ නිසා මේ අවුල ඇතිවුණු එක.

මානවී ඉතින් එක ගෙදරක සහකරුවෙක් එක්ක ජීවත් වෙලා නෑ, ඒ නිසා ඕවා වැඩිය දන්නේ නෑ. හැබැයි ඉතින් කට්ටිය එකතු වෙලා උයාගෙන කාපු වෙලාවට එහෙම, 

"මානවී ඉවුවනේ, මම අස් කරන්නම්" කියපු යාළුවො තමයි මානවී ට ඉන්නෙ. ශ්‍රී ලාංකික, පිට කියල වෙනසක් නැතුව. කොටින්ම අපේ ගෙදරත් බාත්රූම් සෝදන්නේ තාත්ත. මම ඉතින් ඔහොම කල්පනා කර කර ඉන්නකොට, කලින් ජපානේ ඉන්නකොට සිදුවුණු දෙයක් මතක් වුණා.

මේකේ ඉන්නේ ශ්‍රී ලාංකික ජෝඩුවක්.

මේ ශ්‍රී ලාංකික ජෝඩුවේ පිරිමි ළමයා ඉන්නේ අපේ ඩිපාට්මන්ට් එකේ (අපි එයාට විශ්ව කියමු). ගෑණු ළමයා (අපි එයාට ශලිනි කියමු) හිටියේ ටිකක් ඈතක තියන විශ්ව විද්‍යාලයක. මේ විශ්ව එහෙම රොමැන්ටික් චරිතයක් බව කවදාවත් පෙනුනේ නැහැ, කපල් ෆොටෝ එකක් වත් ෆේස්බුක් දාල නැති, අපි ඉස්සරහ දෙන්නට දෙන්න බයිට් කරගන්න, බැනගන්න ජෝඩුවක් මේ. හැබැයි විශ්ව, ෆේස්බුක් එකේ ප්‍රොෆයිල් පික්චර් එකේ නොදැම්මට, එයාගේ වොලට් එකේ ශලිනි ගේ ෆොටෝ එකක් දාන් ඉන්නෙ. කොහොමහරි ෆීල්ඩ් විසිට් ගිහිපු වෙලාවක, ඇමරිකන් කෙල්ලෙකුයි, බන්ගලාදේෂි කෙල්ලෙකුයි මේක දැකල මගෙන් මෙහෙම ඇහුව.

"අනේ විශ්ව හරිම හොඳ සැමියෙක් නේ. ලංකාවේ හැම පිරිමියා ම මෙහෙමද?"

අපේ නම රැකගන්න ඕන අපිමයි නේ, ඉතින් මම කිවුව,

"ඔව් ඔව්, ගොඩක් අය එහෙමයි. ඉතින් එහෙම විශේෂයෙන් අහන්නේ ඇයි.. ඔයාලගේ රටවල් වල පිරිමි එහෙම නැද්ද?"

ඉතින් දවසක් අපි සෙට් එකක් කතා වුණා දකුණු සහ ගිනිකොණදිග ආසියානු කෑම තියන රෙස්ටුරන්ට් එකකට ගිහින් කමු කියල. මමයි, විශ්වයි ඇරෙන්න අනිත් අය විදෙස් රටවල් වල කට්ටිය. ඉතින් ඔන්න පිටත් වෙන වෙලාව කිට්ටු වෙන්නත් කලින්ම, විශ්ව යන්න නැගිට්ට.

"දැන්ම මොකෝ? අපි හයාමාරට නේ යන්නෙ?"

"ඔයාල හෙමීට එන්න. මම දැන් ටක් ගාල ගෙදර ගිහින් බත් එකක් රයිස් කුකර් එකේ ගහල එන්නම්"

"බත් ඇයි? ශලිනි එන්නේ නැද්ද?"

"නෑ අනේ. එයා එනකොට ටිකක් හවස් වෙනව කිවුව, ඉතින් අරුන්ට ඒ වෙනකම් බඩගින්නේ බලන් ඉන්න කියන්න බෑ නේ. එයා ගෙදර ගිහින් කයි. මම එන්නම් කට්ටිය එක්ක කන්න."

මුකුත් නොදන්න බබා පාට් එකේ මම මෙහෙම ඇහුව.

"ඉතින් ඔයා අපිත් එක්ක යමු, ශලිනි ගෙදර ගිහින් බත් එක උයාගෙන කයි නේ?"

"බෑ නේ, එතකොට බත් එක ඉදෙනකම් එයා බඩගින්නේ ඉන්න එපයි?"

ඔන්න ඔහොමයි මිත්‍රවරුනි. ආදරේ ඇත නුදුටු තැන්වල.


(කාටුන් ) ජෝඩුවක්. පින්තූරය Google වෙතින්.

මට හිතුණා මේක වැලන්ටයින් දවසේ බැරි වුනත්, වැලන්ටයින් මාසේ ඉවර වෙන්න කලින් ලියල තියන්න ඕන කියල.


මහා ලොකු බැඳීම් නොවෙන්න පුළුවන්, මහා ලොකු ගිවිසුම් නැති වෙන්න පුළුවන්, ඒත් ආදරේ ඕනෑම මොහොතක දැනෙන්න පුළුවන්.

ෆේස්බුක් එකේ, සහන් කසීර වික්‍රමසිංහ වැලන්ටයින් ඩේ එක වෙනුවෙන් ලියපු මේකත් කියවන්නකෝ


මාතෘකාවට යොදා ගත්තු "ආදරේ ඇත නුදුටු තැන්වල" කියන එක අහුලගත්තේ "කන්දක් සේ මා" චිත්‍රපටයෙන්. ඒකට ස්තුතියක් ලෙස, මම ෆිල්ම් එකේ ට්‍රේලර් එක ඇඩ් කරනවා මෙතන.





.. අර ගැජට් එක හොඳයිඒක වැඩ කළා හොඳට


December 23, 2018

නවාතැන්පොළේ කතා / Home away from home - 02


නවාතැන්පොළේ කතා / Home away from home පළමු කොටස මෙතනින් ගිහින් බලල එන්නකෝ.

මේ දවස් වල නත්තල් නිවාඩු නිසා පරිසරය ටිකක් පාලුයි. විශ්ව විද්‍යාලයේත් හැමෝම වගේ නිවාඩුවට ගෙවල් වල ගිහින්, සමහර අය ඇවිදින්න ගිහින්, බොහොම ටික දෙනයි වටපිටාවෙ පේන්නත් ඉන්නෙ, සීතල හා අඳුර එක්ක හැමෝම ගෙවල් ඇතුලට වෙලා ගුලි වෙලා තමයි ඉන්නෙ. අපේ ගෙහිමියත් එයාගේ මැද මිදුලේ වාසය අත් ඇර දාල, ගේ ඇතුලේ ගුලි වෙලා ඉන්නව මේ දවස් වල.

ඔය මැද මිදුල ගැන ටිකක් විස්තර කරනවා නම්, මේ ගෙදර මම ඇතුළු තවත් පිටස්තර කිහිපදෙනෙකු නවාතැන් අරන් ඉන්නේ ගෙදර ප්‍රධාන කොටසේ. ගෙහිමියා සහ ඔහුගේ සහකරු ජීවත් වෙන්නේ ඊට පිටුපසින් තියන වෙනම කොටසක. පෙනුමින් පොඩි වුණාට, ගෙහිමියා වාසය කරන කොටස ඇතුලෙත් නිදන කාමරයට අමතරට නාන කාමරයක්, පොඩි කුස්සියක් වගේම, ඉතා කුඩා සෝනා එකකුත් තියනව. මේ ගෙදර අපි වසන කොටසයි, ගෙහිමියා වසන කොටසයි අතරේ තියන කුඩා ඉඩේ, ඔහු විසින් ගසක් එහෙම සිටුවල, පොඩි බංකු දෙකක් හදල තියනව, බංකු කිවුවට, මේ බංකු වලට වහලක් තියනව, ඒ වහල වටේට වතුර බහින්න වැහි පීලි සවි කරල තියනව, හදිසියකට ගීතයක් එහෙම වාදනය කරන්න, ෆෝන් එකක් චාජ් කරන්න එහෙම එක්ස්ටෙන්ෂන් කෝඩ් එකක් ඇදගන්න පුළුවන් කමකුත් තියනව. එතනම එහා පැත්තෙ තියෙන්නේ ඔහුගේ බීර හා වයින් ඇතුළු අනිකුත් අඩුම කුඩුම පුරවපු ශීතකරණය. ජීවිත කාලේ හොඳට මහන්සි වෙලා වැඩ කරලා, විශ්‍රාමික ඔහු, දැන් ඉතින් කරන්නේ මේ බංකුවට වෙලා ආතල් එකේ ෂොට් එකක් දාන එක තමයි.

ඇත්තටම ඔය මම කියපු බංකු, වැහි පීලි, සෝන එක ඇතුළු තවත් නොයෙකුත් අඩුම කුඩුම ජාති, මේ ගෙහිමියා විසින් තනියම හදපු දේවල්. උදේ පටන් ගත්තම හවස් වෙනකම් ඔහු කරන්නේ ෂොට් එකක් දාන ගමන් මේ පොඩි පොඩි දේවල් හදන එක. අපේ සමහරු, බොන්න ගත්තම, සිහි නැති වෙනකම් නාලා කරන සමහර විකාර දේවල් (අපේ මියුරු තුමීත් ලියල තිබුණ මේ ගැන) එක්ක බැලුවම, මේ මනුස්සයා බීලා කරන මේ නිර්මාණාත්මක දේවල්, ඇත්තටම අගය කල යුතුයි.

ඉතින් ගෙහිමියාගේ බංකු ආතල් එක කරන්න පුළුවන් ගිම්හාන කාලෙයි, සරත් කාලෙයි විතරයි, දැන් ඒ බංකුවේ කුෂන් එහෙම ඉවත් කරල, බංකුව ශිශිර නිද්‍රාවකට පත් කරලා තමයි තියෙන්නෙ, මේ දවස් වල. ගිම්හානයේ, හවස් වෙනකම් ම ඉර අවුව තියන කාලෙට, සමහර දවසට, මම කැම්පස් එකේ ඉඳන් ගෙදර ඇවිත්, ඔය බංකුවේ වාඩි වෙලා පොඩි චැට් එකක් දාන් ඉන්නවා ගෙහිමියා එක්ක. එහෙම කතා කරනකොට ඔහු කියපු නොයෙකුත් කතා අතරේ, මගේ හිත වැඩියෙන්ම ඇදගත්ත කතාව තමයි මේක.

"ජීවිතේ දුක හිතෙන අවස්ථා එනව තමයි. නමුත් දුකයි සැපයි දෙකම තියනකොට වර්ණවත්, වලට ගියාට පස්සෙ එහෙමවත් නෑ නේ, තණකොළ වැවිච්ච තැනිතලා පොලව විතරයි. හරිම ෆ්ලැට්. බෝරින්. දැන් අඩුම තරමේ සැප දුක එක්ක සයිනාකාර හැඟීම් අපිට දැනෙනව නේ, නිකම් ම ෆ්ලැට් දේකට වඩා සයිනාකාර දෙයක් කොයි තරම් නම් රසවත් ද"

ඔහු මේක කිවුවේ සයිනාකාර විදියට අත ගෙනියන ගමන්, ඔහු කියපු දේ එලෙසම ලියන්න මගේ භාෂා හැකියාව මදි. ඒ නිසා සයින් වක්‍රය මෙතන අලවනවා, අමතක අයට මතක් වෙන්නත් එක්ක.


සයින් වක්‍රය ඉහත රූපයේ දැක්වේ. පින්තූරය Google වෙතින්.


*****


කෑම උයන විදි ගැන ටිප්ස් ටිකක් ලියන්න කියල තිබුණ නේ අපේ බසු තුමා. ඉතින් ටිප්ස් ම නෙවෙයි ,ඔය පොඩි පොඩි විස්තර ටිකක් ලියන්න හිතුව, කෑම ගැන. අපි මෙහෙම විප්‍රවාසේ ඉන්නකොට, සමහර වෙලාවට අපි ළමා කාලේ කාපු බීපු හැටි මතක් වෙලා, පපුව හෝස් ගාල යන අවස්ථා එනව නේද? අන්න ඒ වෙලාවට පහසුවෙන් කන්න හදාගන්න පුළුවන් අනං මනං ටිකක් තමයි මේ.

ඔය කොයි කවුරුත් අමුවෙන් ඇඹරැල්ල කාල ඇති නේ, ලුණුත් එක්ක. අන්න එහෙම දොළ දුකක් ආවම කන්න හදාගන්න පුළුවන් දෙයක් තමයි Kiwifruit. ලෙලි ඇරලා, පෙති කපලා අරන්, ලුණු ගම්මිරිස් ටිකක් ඉහලා කලවම් කරගත්තම නියමයි. ඔය පින්තූරේ මම ගෑරුප්පුව ඒක ඇතුලෙම දාල තියෙන්නේ, ෆොටෝ එක ගන්න කලින් පෙරේතකමට කෑල්ලක් කාපු නිසා. නමුත් ගෑරුප්පු ඒක ඇතුලෙ දාල ගොඩක් වෙලා තියන්න එපා, දන්නවනේ, ඇඹුල් ජාති නේ.


ගම්මිරිස් හා ලුණු දැමූ කිවි. ෆොටෝ එක මගේ.

එක පාරක් යාළුවෙක් අම්බරැල්ල කරියක් හදල තිබුණ, ඇඹරැල්ල වෙනුවට කිවි දාල. ඒකත් නියමයි, රෙසිපිය නම් අහන්න බැරි වුණා හැබැයි.

අඹ හෝ ලොවි අච්චාරු මතක් වෙලා පපුව හෝස් ගාල ගියොත්, ටක් ගාල ඇපල් ගෙඩියක් කපල, ලුණුයි, මිරිස් කුඩුයි ඉහල කාල බලන්නකො. අඹ හෝ ලොවි වගේ කොලිටි නෑ ඉතින්, නමුත් උන්නු හැටියට මලා මදැයි කියල කන්න පුළුවන්.


මිරිස් කුඩු හා ලුණු දැමූ ඇපල්. ෆොටෝ එක මගේ.

මම එක පාරක් යාළුවෙක් ගේ ගෙදර ගිහිපු වෙලාවක, කට්ටියට බියර් බොනකොට කන්න ඔහොම ඇපල් හදල දුන්න. එයාල රසයි කියල කෑව, ඒ කියන්නේ ඉතින් බයිට් එකක් විදියටත් හොඳ ඇති. මගේ නම් බියර් එක්ක වැඩිය ඇයි හොඳයියක් නෑ.


*****

මේක නම් සමහර විට ඔයාල අහලත් ඇති, නමුත් මට මේ ලඟදි යාලුවෙක් එවපු නිසා, බෙදාගන්න හිතුණ. මේක හෙඩ්ෆෝන් දාල අහල බලන්නකො.




දැන් මේකත් අහන්නකො හෙඩ්ෆෝන් දාගෙනම. කට්ටිය නම් එක එක විදියට කමෙන්ට් කරල තිබුණ, නමුත් මට නම් හරිම ලස්සනයි.




හැමෝටම ලස්සන නත්තල් නිවාඩුවක් ප්‍රර්ථනා කරනවා. 2019 වසරේ සියලු පැතුම් ඉටු වේවා!